|| śrīramaṇacatvāriṁśat ||
vande śrīramaṇarṣerācāryasya padābjam | yo me'darśayadīśaṁ bhāntaṁ dhvāntamatītya || kathayā nijayā kaluṣaṁ haratā karuṇānidhinā'ruṇaśailajuṣā | khagavāhanabhāṣitatattvavidā vṛṣavāhanamaunarahasyabhṛtā || 1 || gaṇarāṇmukhasūrisabhāguruṇā guṇasañcayaratnamahodadhinā | ghanagūḍhasahasrakareṇa yathā tanukañcukaguptamahāmahasā || 2 || catureṇa calendriyanigrahaṇe paṭunā parakīyaguṇagrahaṇe | chalavarjitamaunasamādhijuṣā balatarjitabhīkarakāmaruṣā || 3 || jaṭharaṁ samaye paripūrayatā kaṭhinaṁ vratamadritaṭe caratā | jhaṣaketanaśastradurāpahṛdā kṛṣimātmavibodhavidhau dadhatā || 4 || bhavabhīkaravārinidhiṁ taratā karatāmarasena supātravatā | svadṛśā'dhikaśītalakāntibhṛtā bhayamaṅghrisarojajuṣāṁ haratā || 5 || namatāmatibhaktimatāṁ nidhinā ghanatāpavidhūnanasannidhinā | yatidharmatatiṁ paripālayatā paritaśca tamo vinivārayatā || 6 || phaṇināyakavarṇyaguṇaughabhṛtā bhaṇitīḥ priyasatyahitā bhaṇatā | bahumānavaśādayatā sukhitāmavamānatateravidūnavatā || 7 || yatināmadhipena kuśāgralasanmatinā dhṛtinā śitacittabhuvā | laharīṁpramadasya sadāvahatā nihatāntaraśātravasaṁhatinā || 8 || bhagavatpadamanyajanāsulabhaṁ svaguṇairadhigatya paraṁ jayatā | mamatārahitena hitena satāṁ nihitena gaṇaprabhuṇā hṛdaye || 9 || dharaṇīdharajāṅkamapi tyajatā dharaṇītalavāsitamodhutaye | naraveṣabhṛtā nagarandhrakṛtā ramaṇena sanāthamidaṁ bhuvanam || 10 || paradeśineva dhavalena vāsasaḥ śakalena veṣṭitakaṭīviśobhinā | varadeśikena naraveṣadhāriṇā śikhivāhanena gurumajjagadbhavet || 11 || atītaguṇajālāya naiṣṭhikabrahmacāriṇe | namo māyāmanuṣyāya gurave tārakāraye || 12 || yānāyātra na kekināṁ kulapatiḥ snānāya na svarṇadī pānāya kṣitibhṛnmahendraduhiturnastanyadugdhāmṛtam | gānāya pramatheśvarāssavayaso naivātra vīṇābhṛto vāsaṁ śoṇagirau karoṣi bhagavan krauñcādribhettaḥ kutaḥ || 13 || ekaṁ vaktramumāṅkavāsavirahaḥ pāṇau na śaktyāyudhaṁ martyatvaṁ na patākinī ca pṛtanā pārśvadvaye nākinām | veṣo'laṁ punareṣa mugdhanayanapracchādane bhūjuṣā- mantardhānamupaiṣi tārakaripo kva stanyadāyādataḥ || 14 || kecidyogavidāṁ puraḥsara iti prajñānibuddhyā pare sādhuḥ kaściditītare gurudhiyā ke'pyaṅghripadmaṁ tava | sevante ramaṇābhidhānamanujakṣemāya jātakṣitau dvitrāstvāṁ girijāṅkapīṭhanilayaṁ jānanti devaṁ guham || 15 || oṅkārārthamupādiśo bhagavate vāṇīmanohāriṇe tātāyāpyupadeṣṭumudyatamabhūt kiñcittvadīyaṁ mukham | jyeṣṭhasyādya sahodarasya gurutāṁ prāpto'si dhīgauravāt subrahmaṇya kaniṣṭhatāmapi gataḥ sarvādhikastvaṁ guṇaiḥ || 16 || yatpūrvaṁ śrutipāradarśidhiṣaṇo dvaipāyano'dhyāruhat paścādbodhakalāvidhūtatimiraḥ śaṅkāpahaśśaṅkaraḥ | tatsampratyakhilāvanītalajuṣāmācāryasiṁhāsanaṁ deva tvāṁ prativīkṣate naratano gīrvāṇasenāpate || 17 || dharme nāśamupāgate tribhuvane paryākule pāpataḥ prajñāne parito girāṁ pathi mudhā sañcāryamāṇe janaiḥ | sadbhāve parameśvarasya ca pituḥ sandehaḍolāṁ gate dvīpaḥ kaitavamartyakekituraga tvāmantarā kassatām || 18 || vairāgyaṁ tava vittamastu karuṇāṁ śaknoṣi hātuṁ kathaṁ dūśyaste'stu samudyamaḥ pitṛpadadhyānaṁ ca kiṁ tādṛśam | kāmaste'stu vigarhito vinamatāṁ rakṣā ca kiṁ garhitā skandacchadmamanuṣya kiṁ nu samayaṁ kañcitsamudvīkṣase || 19 || dūraṁ yāhi kuvāda dharmavṛṣa te netaḥ paraṁ paṅgutā durbhrānte bhuvanaṁ jahīhi parito vardhasva saṁsatsatām | sodaryeṇa samanvito bhuvamimāṁ prāpto gurugrāmaṇīḥ śūrāntaḥpuranetravibhramaharo devo bhavānīsutaḥ || 20 || janmasthānamavāpya guptamahamo yo bhedamādhūtavān bhūtānāṁ caratāṁ pṛthagvidhadhiyāmātmaiva yo bhāsate | dehaṁ sarvamidaṁ jagacca vibhavādākramya yaḥ prollasa- tyekastaṁ gurumūrtimānamata re lambodarabhrātaram || 21 || antaryaśca bahirvidhūtatimiraṁ jyotirmayaṁ śāśvataṁ sthānaṁ prāpya virājate vinamatāmajñānamunmūlayan | paśyanviśvamapīdamullasati yo viśvasya pāre para- stasmai śrīramaṇāya lokagurave śokasya hantre namaḥ || 22 || prasaratāditaḥ śubhavilokitam | ramaṇa te sakṛtphalatu me kṛtam || 23 || ramaṇa janmināmayi bhavān guruḥ | abhida āśayastava mahānuruḥ || 24 || jagadahaṁ paraḥ sphurati me trayam | sadabhidaṁ girā tava visaṁśayam || 25 || tvadupadeśato galati saṁvidā | mayi niranyayā sadahamorbhidā || 26 || ahami yo'ntarastamamalaṁ hṛdi | anubhavema bhostava kṛpā yadi || 27 || na karuṇā guṇastava vidāṁ pate | hṛdayatejasaḥ sahajabhaivate || 28 || tava tanurjvalatyanagha vidyutā | tava dṛgātatā lasati bhāsvatā || 29 || kabalitaṁ manastava vibho hṛdā | tvamasi santataṁ vilasito mudā || 30 || bhuvanabhūpaterbhagavataḥ kṛte | bhavasi pācako yamavatāṁ pate || 31 || narapaśūnimānahami tāḍayan | paraśivaudanaṁ vitanuṣe pacan || 32 || timirāṇi na kevalaṁ vacobhiḥ karuṇāpāṅgavilokitaiśca nṝṇām | hṛdaye prasaranti mardayantaṁ bhagavantaṁ ramaṇaṁ guruṁ namāmi || 33 || bhavajalanidhiṁ gāhaṁ gāhaṁ cirādalasālasān padajalaruhadvandvadvīpaṁ śritāṁstava samprati | ramaṇabhagavan kalyāṇānāṁ niketana pāhi naḥ sadaya dayayā siktairbhaktānapāṅgavilokitaiḥ || 34 || yadi na jananī stanyaṁ dadyācchiśorbata kā gatiḥ yadi paśupatiḥ krodhaṁ kuryātpaśoravanaṁ kutaḥ | yadi padajuṣāmācārya tvaṁ nihaṁsi na saṁśayaṁ bhramaśataparābhūtā ete tarantu bhavaṁ katham || 35 || viśadahasite pūrṇā śāntiḥ sudhākarasodare sthirapṛthulayoḥ pūrṇā śaktirdṛśoratulārciṣoḥ | hṛdayakamale nityā niṣṭhā bahiśca saratprabhe ramaṇabhagavan ko vā maunī samastava bhūtale || 36 || devī śaktiriyaṁ dṛśoḥ śritajanadhvāntakṣayādhāyinī devī śrīriyamambujākṣamahiṣī vaktro sahasracchade | devī brahmavadhūriyaṁ vijayate vyāhāragūḍhā parā viśvācārya mahānubhāva ramaṇa tvāṁ stautu kaḥ prākṛtaḥ || 37 || so'haṁ jāto ramaṇabhagavan pādayoste daviṣṭho yadyapyasminmahati samaye śaktilāsye pravṛtte | sūryasyeva jvalitamahaso dūragāṁ nātha śaktiṁ viśvasyāgyrāṁ tava mama mano vītaduḥkhaṁ tathāpi || 38 || tadbhāgadheyamasamānamanekamauni- vāsārjitaṁ kṣitibhṛtaḥ khalu lohitasya | aṅgīcakāra bhagavān ramaṇo maharṣi- ranyeṣu satsu yadimaṁ bahuṣu sthaleṣu || 39 || śāntirnitāntamadhikā paramāsya śakti- rvairāgyamadbhutatamaṁ karuṇā tu sāndrā | jñānaṁ nirastakuhanaṁ madhuraṁ ca vṝttaṁ nṝṇāṁ nidarśanamayaṁ ramaṇo maharṣiḥ || 40 || nārasiṁhirgaṇapatirvāsiṣṭho ramaṇaṁ gurum | catvāriṁśanmitaiḥ padyaiḥ skandāṁśaṁ stutavānṛṣim ||